Mardi 10 novembre 2009
2
10
/11
/Nov
/2009
22:30
Ass-agi la ttruγ ! Mi nγil merra d aqcic i la yettimγuren deg uεebbuḍ n yemma-m, amejjay yenna-k :"Γef wayen akka ttwaliγ d... taqcict". Isusem. Cwiṭ akka yerna-d : "ulac ccek, d
taqcict tamecṭuḥt i la ttwaliγ". Yerna-yas-d d "tamecṭuḥt", am akken tezmerḍ yakan ad tiliḍ d tameqqrant ! Meεna mačči d aya iγ-iceγben, yemma-m akk d nekk : ur numin ara ayen akken
nesla "d taqcict" ! Ih, d taqcict ay at rebbi ! Nekkni yessarmen si tazwara a d-nesεu taqcict "tamecṭuḥt", nekkni yessarmen a kem-id-nesεu. Allen-iw ččurent-d d imeṭṭi ; mmuqleγ
γer yemma-m, kif kif ttiriqent wallen-is...
Ihi tura zemmreγ am-in mmeslayeγ, ad serseγ ameẓẓuγ-iw γef uεebbuḍ n yemma-m akken am-in-sleγ tettembiwileḍ (bγiγ a d-iniγ am tmerdedda, ugadeγ ad teččḥeḍ). Tura yal ass ḥemmleγ mi d-serseγ
afus-iw fell-am ay id-wteḍ s rkel akken qqaren. Anda ẓriγ, ahat kemm s uqerru i d-tekkateḍ.
Tikwal uqbel a y-id-yas yiḍes ttwaliγ-kem ger wallen-iw. Ttwaliγ-kem tleḥḥuḍ zdat-i, tafettust-im deg ufus-inu, nteddu, nteddu, nugi a neḥbes, nugi a neεyu. Kemm tezhiḍ, tettfeğğiğeḍ, nekk akter.
Mi d-uγaleγ γer leεqel-iw, afeγ-d iman-iw : allen εemrent d imeṭṭi, ul yekkat am wakken yewwet zdat teqcict-nni i ḥemmleγ i tikelt tamezwarut, acḥal iseggasen aya tura uqbel a d-mmagreγ
yemma-m deg webrid-iw.
Acu ara m-iniγ ? Γeṣbeγ a d-tlaleḍ. Γeṣbeγ a d-tiliḍ, a d-tiliḍ da, zdat-i, a kem-ddmeγ ger ifassen-iw. Ḥareγ a d-tlaleḍ, ẓriγ a d-εawdeγ talalit yid-m, ẓriγ a d-εawdeγ talalit yess-m, ad
uγaleγ d wayeḍnin. Ẓriγ s tlalit-im ad uγaleγ ma ulac yakan d "baba", am wakken yuγal d "lḥağ" winna i d-iẓuren Mekka. Nekk d dduḥ-im ara yuγalen d Mekka-inu, fell-as ad tezziγ alamma yezzi
leεqel-iw. Yerna tura mi d-mmektaγ, am-d-aγeγ dduḥ d ameqqran aγ-yawin di sin, akken ula d nekk, yal mara teṭṭes yemma-m, a d-rewleγ seg ussu i wakken ad ṭseγ d tama-m. Am kemmini ad kemseγ
ifassen-iw ddaw umayeg-iw. Tigecrar-iw a tent-kerrfeγ almi ḥuzant idmaren-iw am wakken lliγ di tεebbuḍ n yemma. Imiren kemm ad tegneḍ, nekk ad ttmuquleγ deg-m. Am-selfeγ γef lḥenk-im, ad urareγ s
ufus-im, a kem-rjuγ akken alamma teldiḍ-d allen-im. Γas ma tεeṭleḍ, yecqa-kem : γuri ad ḥesbeγ iḍuḍan-im. Mi wwḍeγ γer wis εecṛa, a sen-d-εiwdeγ s wadda.
Aha segger, γiwel imγuṛ-d. Ur ttaggad, heggaγ-d yakan dacu ara nurar nekk yid-m. A nurar alamma neεya, xas a nsemmeḥ ula deg imekli-nneγ, xas a nerr iman-nneγ ur s-nesli ara i yemma-m mi ara
γ-d-ssawal, mi d-suγ fell-aγ akken a nekfu turart. A nğelleb, a nbessel, a nessimes lqecc-nneγ. A neḍs s tufra di sin mi tt-neẓra tebda treffu. Mi nwala terfa dayen, a nṛuḥ di sin a s-nger
iγallen, a s-neḍleb smaḥ u a tt-nessuden, kemm γef yiwet n tiṭ, nekk γef tayeḍ... akken ur aγ-d-ttwali mi ara nemmeγmaz i wakken a d-nini : azekka ad as-nεawed."
Boussaâd BOUAÏCH
2009
